Nikolla Collov me fitore historike në Formula 2

Nikolla Collov u bë bullgari i parë që fiton në Formula 2, duke triumfuar në pistën “Albert Park” në Melburn. Piloti i ekipit Campos Racing mori gjithashtu kryesimin në renditjen e përgjithshme të kampionatit me gjithsej 25 pikë. Bullgari e nisi garën nga vendi i pestë, por garoi pa gabime dhe la pas fituesin e titullit në Formula 3, Rafael Kamara nga Brazili, si dhe holandezin Lorens van Hupen.

“Kam ëndërruar dhe e kam parë në ëndërr atë që ndodhi sot”, tha Nikolla Collov pas fitores. Ai shtoi se Campos është familja e tij. “U bëmë kampionë në Formula 4, fituam titullin ekipor në Formula 3. Dua të ndaj çdo moment me Campos dhe Red Bull”, shtoi piloti automobilistol.

Sezoni i Formula 2 pritet të vazhdojë në Bahrein në mes të prillit, por ende nuk është e qartë nëse gara do të zhvillohet, duke pasur parasysh situatën në Lindjen e Mesme.

Redaktoi: Diana Cankova

Përgatiti në shqip: Svetllana Dimitrova