Skema Evropiane për Tregtimin e Emetimeve është e dobishme për Bullgarinë

Skema Evropiane për Tregtimin e Emetimeve (ETS) është një instrument kyç për modernizimin e industrisë, uljen e emetimeve të karbonit dhe sigurimin e një burimi financiar për investime në tranzicionin e gjelbër. Këtë qëndrim e shprehu ministri i përkohshëm i mjedisit dhe ujërave Julijan Popov gjatë forumit “Takimi Rajonal i Energjisë në Nivel të Lartë: Infrastrukturë, inovacione dhe integrim” në Sofje, mësojmë nga një informacion i qendrës së shtypit të Ministrisë së Mjedisit dhe Ujërave.

Sipas ministrit të mjedisit, Bullgaria ka interes të marrë pjesë në ETS, sepse ky sistem nxit uljen e emetimeve dhe siguron të ardhura të konsiderueshme për shtetet anëtare. Bullgaria mund të marrë një burim financiar të rëndësishëm përmes ETS-2 dhe mekanizmave të lidhur evropianë, përfshirë përmes Fondit Social për Klimën. Popov ka shpjeguar se elektrifikimi i konsumit përfundimtar – zëvendësimi gradual i lëndëve djegëse fosile në transport, ngrohje dhe industri me energji elektrike – është një tregues kyç për modernizimin e ekonomisë dhe uljen e emetimeve të gazrave serrë. Pjesa e elektrifikimit të konsumit përfundimtar në BE është rreth 21–22 për qind, ndërsa në Kinë arrin 32–33 për qind. Bullgaria paraqitet relativisht mirë me rreth 27 për qind, gjë që krijon parakushte të mira për zhvillimin e industrisë. Ministri ka komentuar gjithashtu energjinë e erës si një balancues afatgjatë në sistemin energjetik. “Ka investitorë dhe ata janë të gatshëm të investojnë pa u mbështetur në subvencione publike. Për Bullgarinë është jashtëzakonisht e rëndësishme të zhvillojë këtë sektor, nëse duam të ruajmë çmime të ulëta të energjisë elektrike dhe të ruajmë autonominë dhe pavarësinë energjetike” – mendon Popov.

Ai ka komentuar edhe zhdukjen graduale të industrisë së qymyrit, e cila “nuk është një vendim politik, por një realitet ekonomik”. Sipas tij qymyri duhet të mbetet si rezervë strategjike, sepse në botë ka luftëra dhe situata ekstreme. Popov ka theksuar gjithashtu faktin se Bullgaria nuk disponon mjaftueshëm gaz dhe naftë, por ka mundësi të riciklojë materiale të vlefshme, ndërsa mbajtja e këtyre burimeve në Evropë është e rëndësishme për sigurinë e burimeve dhe për zhvillimin e industrisë.

Përpiloi: Cvetana Tonçeva

Përgatiti në shqip: Sindi Nikollofski