Festa e zellnikut në fshatin Zhabokrrët të Kjustendillit

Krahina e Kjustendillit në Bullgari njihet për kuzhinën e shijshme, por banorët vendas janë veçanërisht të zotë në përgatitjen e banicës dhe zellnikut. Për të 18-tin vit radhazi, fshati Zhabokrrët fton dashamirësit e gatimeve tradicionale bullgare të shijojnë nga zellnikët më të mirë në rajon. Organizator i “Festës së zellnikut dhe ëmbëlsirave” është Shtëpia e Kulturës Popullore “Sëgllasie 2007” në fshat, e regjistruar në listën kombëtare të UNESCO-s “Thesare të gjalla njerëzore” si ruajtëse e traditës për përgatitjen e zellnikut të Kjustendillit.

• Nga marmelata e shalqinit e deri tek Dita e Dervishëve - cilat janë "Thesaret e gjalla njerëzore" të Bullgarisë

Festa është më 25 dhe 26 prill, ndërsa mysafir special do të jetë këngëtari popullor Georgi Ilievski. Pjesëmarrje kanë konfirmuar ansamble nga vendi dhe jashtë tij, si dhe trupa amatore pranë shtëpisë lokale të kulturës. Në program janë përfshirë edhe shumë skeçe, surpriza dhe interpretime folklorike.

Pjesëmarrësit në konkursin kulinar për zellnikun, banicën dhe bukën më të mirë do të vlerësohen nga një juri sipas kritereve si pamja e jashtme, cilësitë e shijes, hollësia e petëve, dendësia dhe shumëllojshmëria e mbushjes.

• Banica është ndër elementet më të njohura të kuzhinës bullgare në botë

Në festën, e cila promovon traditat vendore dhe trashëgiminë kulinare të krahinës së Kjustendillit, do të paraqiten edhe rituale të kushtuara bukës.

Ngjarja realizohet me mbështetjen e Komunës së Kjustendillit.

Përpiloi: Darina Grigorova

Përgatiti në shqip: Sindi Nikollofski