Shkencëtarët zbulojnë sekretet e një anijeje të mbytur pranë Kitenit

Një ligjëratë akademike kushtuar kërkimeve arkeologjike nënujore mbi anijen me vela të mbytur "Urdoviza" në gjirin jugor të Kitenit do të prezantohet më 15 korrik në Qendrën Kulturore "Kazino Detare" në Burgas. Me një shkallë ruajtjeje të strukturës prej druri të trupit të anijes mbi 90%, kjo është anija prej druri me vela më e ruajtur në zonën e cekët të bregdetit bullgar të Detit të Zi.

Ligjërata do të mbahet nga drejtuesi shkencor i kërkimeve, dr. Dragomir Gërbov, dhe do të fillojë në orën 17:30 sipas kohës lokale. Ai do të prezantojë historinë e kërkimeve, rezultatet e sezonit të pestë arkeologjik në gjirin jugor të Kitenit dhe të dhënat e mbledhura mbi ndërtimin, veprimtarinë tregtare dhe ditët e fundit të anijes dhe ekuipazhit të saj.

Sipas arkeologëve, anija me vela është ndërtuar në çerekun e dytë të shekullit XIX dhe është mbytur pak para Kryengritjes së Prillit. Kërkimet bëjnë të mundur rindërtimin e historisë së anijes dhe të ekuipazhit të saj, si dhe ndjekjen e veçorive të lundrimit në Detin e Zi bullgar gjatë periudhës osmane, në bazë të koleksionit të pasur të objekteve të ruajtura mirë nga jeta e përditshme e ekuipazhit.

Në plan ndërkombëtar, "Urdoviza" është vetëm anija e tretë e studiuar në mënyrë sistematike nga epoka osmane në Detin e Zi, pas "Kiten 1" dhe anijes së mbytur "Kulla Ashkelon" pranë Izraelit, gjë që e bën atë të rëndësishme për arkeologjinë nënujore botërore, theksojnë organizatorët për BTA.

Projekti kërkimor "Urdoviza" realizohet nga Instituti për Trashëgiminë Nënujore – Sozopoll dhe Instituti për Arkeologjinë e Lundrimit – SHBA, dhe përfshin shkencëtarë dhe studentë nga Bullgaria, SHBA-ja, Australia, Ukraina, Gjermania, Italia dhe Izraeli.

Organizatorë të ligjëratës së 15 korrikut janë Muzeu Historik Rajonal, Komuna e Burgasit, Fondacioni "Burgas 2032" dhe Qendra Kulturore "Kazino Detare", ndërsa ngjarja mbështet kandidaturën e Burgasit për Kryeqytet Evropian të Kulturës në vitin 2032.

Përpiloi: Vesella Krësteva

Përgatiti në shqip: Sindi Nikollofski