Opera e Stara Zagorës fton të gjithë “Në bregun e Seutopolisit të lashtë”

Nën sipërfaqen e qetë të ujit të liqenit të digës “Koprinka” vazhdon të jetojë Seutopolisi i lashtë – kryeqyteti i sundimtarit trak Seut III. Nga 27 deri më 30 gusht 2026, për të gjashtën herë, në bregun e qytetit të përmbytur, një nga skenat e hapura më tërheqëse në Bullgari bashkon muzikën, teatrin dhe kërcimin.

Fillimi i festivalit “Në bregun e Seutopolisit të lashtë” u vendos nga Opera Shtetërore e Stara Zagorës në vitin 2021, me mbështetjen e Bashkisë së Kazanllëkut, në kuadër të “Festave në Luginën e Mbretërve Trakë”. Në vitet e mëparshme, publiku duartrokiti disa nga shfaqjet më mbresëlënëse të teatrit të operës në Stara Zagora. Sot festivali ka fituar një profil të veçantë – me një repertor të larmishëm shumëzhanror, produksione tërheqëse dhe një ndjesi unike të historisë mijëravjeçare të vendit ku zhvillohet.

Çdo edicion shton një nuancë të re në hartën kulturore të Kazanllëkut dhe e shndërron bregun e liqenit të digës “Koprinka” në një skenë me identitetin e vet artistik. Këtë vit, “Në bregun e Seutopolisit të lashtë” ofron një program intrigues me klasikën operistike bullgare, një operetë të famshme evropiane dhe një koncert bashkëkohor.

Më 27 gusht do të prezantohet opera “Lud Gidia” e Parashkev Haxhievit, e frymëzuar nga poema me të njëjtin emër e Penço Sllavejkovit. Me personazhet e saj të spikatura, subjektin emocionues dhe gjuhën e pasur muzikore, vepra, në të cilën është koduar fjalë për fjalë geni bullgar, është një zgjedhje e natyrshme për bregun e Seutopolisit të lashtë, ku jetojnë legjendat dhe shpirti i tokës bullgare.

Më 29 gusht, skena pranë liqenit të digës “Koprinka” pret humorin elegant, meloditë e bukura dhe atmosferën festive të kryeveprës së shkëlqyer të operetës “Lakuriqi i natës” të Johann Strauss-it të Ri, nën drejtimin e dirigjentit Vlladimir Boshnakov.

Festivali përfundon më 30 gusht me koncertin “Rock Swings”, me Vasill Petrovin, orkestrën e Operës Shtetërore të Stara Zagorës dhe miqtë, nën drejtimin e dirigjentit Cvetomir Vasilev.

“Festat në Luginën e Mbretërve Trakë” janë ndër aktivitetet më të rëndësishme të Bashkisë së Kazanllëkut. Çdo vit ato bashkojnë forma tradicionale dhe bashkëkohore të arteve të ndryshme, me qëllim promovimin e trashëgimisë kulturore të trakëve të lashtë.

• "Bota e Trakëve" është një park për adhuruesit e trashëgimisë antike

Redaktoi: Cvetana Tonçeva

Përgatiti në shqip: Sindi Nikollofski